Ichki ishlar organlarida axborot texnologiyalarini joriy etish yoʻnalishi boʻyicha amalga oshirilgan ishlar yuzasidan videoseminar tashkil etildi

Ichki ishlar vazirligi tizimida fuqarolarning haq-huquqlarini taʼminlash va qonuniy manfaatlarini himoya qilish hamda ularga davlat xizmatlarini koʻrsatish sifatini yaxshilash maqsadida zamonaviy axborot-telekommunikatsiya texnologiyalaridan keng foydalanilmoqda.

Jumladan, ichki ishlar organlarining faoliyatiga raqamli va axborot texnologiyalarini faol joriy etish, aholiga elektron davlat xizmatlarini koʻrsatish sifatini oshirish, byurokratik toʻsiq va gʻovlarga yoʻl qoʻymaslik hamda idoralararo elektron hamkorlikni kengaytirish boʻyicha izchil ishlar amalga oshirilmoqda.

2024-yil davomida raqamlashtirish sohasida amalga oshirilgan ishlar va erishilgan yutuqlar boʻyicha joriy yil 10-yanvar kuni Ichki ishlar vazirligida oʻquv-amaliy videoseminar tashkil etildi.

Mazkur videoseminarda Respublika IIO masʼul sohaviy va hududiy tuzilmalari mutaxassislari va rahbarlari ishtirok etdilar.

Videoseminarda Ichki ishlar vazirligi Axborot texnologiyalari, aloqa va axborotni himoyalash boshqarmasi, Huquqiy statistika va tezkor-hisob maʼlumotlar bosh markazi hamda “Xavfsiz shahar“ tizimlarini rivojlantirish markazi davlat muassasasi tomonidan tayyorlangan taqdimotlar namoyish etildi.

Xususan, “Xavfsiz shahar” tizimining Yagona apparat-dasturiy platformasi va uning imkoniyatlari taqdimot qilinib, “Loyihalar monitoringi” dasturiy taʼminoti yaratilgani va uning yordamida “Xavfsiz shahar” konsepsiyasi doirasida Respublika miqyosidagi loyihalarning manzilli yillik dasturlari ijrosi, amalga oshirilishi lozim boʻlgan tadbirlar rejalari va ularni bajarilish holatlari nazorati koʻrsatib berildi.

Shu oʻrinda, ichki ishlar organlari faoliyatini avtomatlashtirish maqsadida joriy etilgan axborot tizimlari va ular yordamida erishilgan samaradorlik koʻrsatkichlari yigʻilish ishtirokchilariga yetkazildi.

Seminarda Ichki ishlar vazirligi tomonidan aholi va tadbirkorlik subyektlariga koʻrsatilayotgan davlat xizmatlari muhokama qilinib, migratsiya va fuqarolik masalalari, litsenziya, avtotransport, ijtimoiy himoya, huquqiy statistika va jazoni ijro etish yoʻnalishlarida koʻrsatilayotgan davlat xizmatlari raqamli koʻrinishga oʻtkazilib, fuqarolar masofadan turgan holda inson omilisiz IIO xizmatlaridan foydalanish imkoniyatlari joriy etilgani taʼkidlandi.

Qayd etish lozimki, seminar davomida Vazirlik tomonidan erishilgan ijobiy tajribalarni hududiy tuzilmalar faoliyatida ham joriy etish boʻyicha tavsiya va koʻrsatmalar berildi.